थोरात कारखान्याचा मंगळवारी बॉयलर अग्नी प्रदीपन समारंभ

 

संगमनेर / सहकारासाठी दिशादर्शक असलेल्या सहकारमहर्षी भाऊसाहेब थोरात सहकारी साखर कारखान्याच्या सन 2022 - 23 गळीत हंगामाचा बॉयलर अग्निप्रदीपन समारंभ मंगळवार दिनांक 27 सप्टेंबर 2022 रोजी सकाळी 11 वा. काँग्रेस विधिमंडळ पक्षनेते आमदार बाळासाहेब थोरात व सौ.कांचनताई थोरात यांच्या शुभहस्ते व आ.डॉ.सुधीर तांबे, बाजीराव पा.खेमनर यांच्या उपस्थितीत आणि कारखान्याचे चेअरमन प्रतापराव ओहोळ यांच्या अध्यक्षतेखाली होणार असल्याची माहिती उपाध्यक्ष संतोष हासे यांनी दिली आहे.


काँग्रेस पक्ष नेते आमदार बाळासाहेब थोरात यांच्या मार्गदर्शनाखाली थोरात सहकारी साखर कारखान्याने मागील गळीत हंगामात 15 लाख 53 हजाराचे विक्रमी गाळप केले आहे. शेतकरी,सभासद, कार्यक्षेत्र बाहेरील ऊस उत्पादक या सर्वांचा थोरात कारखान्यावर मोठा विश्वास असून या कारखान्याने कायम सर्वाधिक भाव दिला आहे. मंगळवारी कारखान्याचे संचालक इंद्रजीत भाऊ थोरात व त्यांच्या सुविद्य पत्नी सौ.आरतीताई थोरात, कारखान्याचे उपाध्यक्ष संतोष हासे व त्यांच्या सुविद्य पत्नी सौ. मनीषा ताई हासे, रमेश गुंजाळ व सौ.ममताताई रमेश गुंजाळ, इंद्रजीत अशोकराव खेमनर व सौ.सोनालीताई इंद्रजीत खेमनर, विनोद गणपत हासे व सौ.वैशालीताई विनोद हासे,अनिल गणपत काळे व सौ.लताताई अनिल काळे यांच्या शुभहस्ते बॉयलर अग्निप्रतिबंध पूजा होणार आहे.

या कार्यक्रमासाठी संगमनेर तालुक्यातील अमृत उद्योग समूहातील विविध संस्थांचे पदाधिकारी व मान्यवर उपस्थित राहणार आहेत. तरी या कार्यक्रमाला शेतकरी, ऊस उत्पादक व सभासद यांनी उपस्थित राहावे असे आवाहन सर्व संचालक मंडळ व कार्यकारी संचालक जगन्नाथ घुगरकर यांनी केले आहे.